فوتو: gov.kz
استىقتى كەيبىر نارىقتارعا جەتكىزۋ 30 كۇنگە دەيىن سوزىلادى. سوندىقتان ەكسپورتتاۋشىلارعا جونەلتۋدى الدىن الا باستاۋ ۇسىنىلادى. سۋبسيديا الۋ ءۇشىن ەڭ باستى تالاپ – استىقتىڭ 2026 جىلى ناقتى جەتكىزىلگەنىن دالەلدەيتىن قۇجاتتاردىڭ بولۋى.
2024 جىلى قازاقستاندا استىق پەن مايلى داقىلداردان وتە مول ءونىم الىندى. ال ورتالىق ازيا نارىقتارىنىڭ مۇمكىندىگى شەكتەۋلى بولعاندىقتان, استىق ارتىق جينالىپ, ىشكى نارىقتا باعاعا قىسىم ءتۇستى. 2024 جىلدىڭ سوڭىندا جوعارى باسەكەلەستىك پەن وتكىزۋدىڭ شەكتەۋلى بولۋىنىڭ سالدارىنان استىق باعاسى تومەندەدى.
وسى جاعدايدى رەتتەۋ ءۇشىن ۇكىمەت استىق ەكسپورتىنداعى كولىك شىعىندارىن سۋبسيديالاۋ باعدارلاماسىن ىسكە قوستى. ناتيجەسىندە استىق ساتىلاتىن ەلدەر كوبەيىپ, تاسىمال كولەمى ارتتى.
2025 جىلدىڭ 11 ايىندا تەمىرجول ارقىلى استىق تاسىمالى:
• قارا تەڭىز پورتتارىنا – 2,5 ەسە,
• رەسەيدىڭ بالتىق تەڭىزى پورتتارىنا – شامامەن 3 ەسە,
• بالتىق ەلدەرىنە – 8 ەسە,
• ازەربايجانعا – 5,5 ەسە,
• يرانعا – 2 ەسە ارتتى.
ەكسپورتتىڭ ۇلعايۋى ىشكى نارىققا جاقسى اسەر ەتتى, ياعني, باعا تۇراقتالدى, ارزانعا ساتۋدىڭ (دەمپينگ) قاۋپى ازايدى, لوگيستيكا, قايتا وڭدەۋ جانە سەرۆيستىك سالالار دامىدى.
بيىل دا شارۋالار مول ءونىم الدى, ءارى وتكەن جىلدان قالعان استىق قورى ساقتالدى. باعدارلامانىڭ تيىمدىلىگىن ەسكەرىپ, ۇكىمەت 2026 جىلى دا ەكسپورتتاۋشىلار مەن استىق وندىرۋشىلەردى قولداۋدى جالعاستىرادى.
2025 جىلدىڭ 11 ايىندا بارلىعى 12,6 ملن توننا استىق تاسىمالداندى, بۇل وتكەن جىلمەن سالىستىرعاندا 34%-عا كوپ. ونىڭ 9,7 ملن تونناسى ەكسپورتقا شىعارىلدى.
ال 2025–2026 ماركەتينگتىك جىلدىڭ العاشقى ءۇش ايىندا (قىركۇيەك–قاراشا) 4,4 ملن توننا استىق تاسىمالدانىپ, ەكسپورت 3,4 ملن تونناعا جەتتى.
2025 جىلدىڭ جەلتوقسانىندا ىشكى نارىقتاعى بيداي باعاسى 2024 جىلمەن سالىستىرعاندا 40–50%-عا جوعارى بولدى. ءبىر تونناعا 40 اقش دوللارى كولەمىندەگى كولىك سۋبسيدياسى شارۋالارعا تابىستى ساقتاۋعا, قازاقستاندىق بيدايدىڭ باسەكەگە قابىلەتتىلىگىن ارتتىرۋعا جانە ەۋروپا, افريكا, تاياۋ شىعىس پەن ورتالىق ازيا نارىقتارىندا ورنىن نىعايتۋعا ىقپال ەتەدى.
